नयाँ दिल्ली, असोज १० (एजेन्सी)- यो वर्ष ओस्कार अवार्डमा फिल्म 'पिप्ली लाइभ'ले भारतको प्रतिनिधित्व गर्ने भएको छ। आमिर खानद्वारा निर्मित र अनुषा रिज्वीद्वारा निर्देशित 'पिप्ली लाइभ'ले उत्कृष्ट विदेशी भाषाको फिल्मतर्फ भिड्नेछ। फिल्म फेडेरेसन अफ इन्डिया(एफएफआई)ले यो वर्ष ओस्कारमा पठाउनका लागि २७ फिल्मको अन्तिम सूची निकालेको थियो। तामिल ब्लकबस्टर 'अंगाडी थेरु' र मलयालम फिल्म 'कुट्टी स्रान्क' लगायत फिल्मलाई उछिन्दै 'पिप्ली लाइभ'ले ओस्कारको प्रवेश पाएको हो।'कुट्टी स्रान्क' भर्खरै भारतको राष्ट्रिय फिल्म अवार्डबाट पुरस्कृत फिल्म हो। भारतीय किसानको स्थिति र मिडियाको अतिरञ्जनालाई राम्रोसँग प्रस्तुत गरिएकोले 'पिप्ली लाइभ' छानिएको एफएफआईका अध्यक्ष एल सुरेशले बताए। यो फिल्मले सनडान्स र टोरन्टो जस्ता फिल्म महोत्सवमा भाग लिइसकेको छ।आमिर खान आवद्ध भएको 'लगान', 'रंग दे वसन्ती' र 'तारे जमीन पर'ले यसअघि ओस्कारमा भारतको प्रतिनिधित्व गरिसकेका छन्।
आठ करोड भारुमा निर्मित 'पिप्ली लाइभ'ले अहिलेसम्म ५० करोडको कारोवार गरिसकेको छ।
'यो समाचार सुनेर म एकदम खुसी भएँ, देशको प्रतिनिधित्व गर्न पाउनु विशेष गौरवको कुरा हो, एफएफआईले हामीलाई लायकको सम्झिकोमा आभार व्यक्त गर्न चाहन्छु,' निर्माता आमिरले भने, 'निर्देशक अनुषा र समस्त टिमलाई मेरो बधाई छ।'
मुम्बई, साउन २६ -न कुनै ठूला कलाकार, न त ठूलो लगानी नै। आउँदो शुक्रबार रिलिज हुने बलिउडको पिप्ली लाइभले सिनेमाघरमा दर्शक छिर्नु अघि नै लगानी उठाइसकेको छ। आमिर खानले निर्माण गरेको यो फिल्म 'आमिर खान ब्रान्ड'का कारण चर्चामा छ भने लगानी उठिसकेपछि अब जति टिकेट काटिन्छ उति फिल्मको कमाई! बलिउड हङ्गामाले त उनको कमाइलाई त 'उपरवाला जव देता हे तो छप्पर फाडके' समेत भनेको छ। तर फिल्मको लगानी कति र कति रकम उठेको भन्ने समाचारमा खुलाइएको छैन।