काठमाडांै/ अहिलेका व्यस्त अभिनेता विराज भट्टले इ-एक्स थ्री डिजिटल क्यामेराले खिचिने फिल्ममा अभिनय गर्न आनाकानी गर्न थालेका छन् । 'इ-एक्स थ्रीमा धेरै फिल्म खेलियो । रिजल्ट पनि खासै राम्रो आएन । त्यसैले इ-एक्स थ्रीवाला फिल्म नखेल्ने सोचमा पुगेको छु,' विराजले भने, 'कहिल्यै खेल्दिनँ भन्नेचाहिँ होइन । राम्रा ब्यानर, दमदार स्त्रिप्ट भएमा कुन क्यामेराले खिचिन्छ, ठूलो कुरा होइन ।'
इ-एक्स थ्री क्यामेराले खिचिने भएकाले विराजले केही महिनाअघि नै सम्झौता गरेको निर्माता रिमेश अधिकारीको नयाँ फिल्म अंकुश नखेल्ने भएका छन् । विराजले अंकुश टु के नभए सुपर सिक्टिन क्यामेराले खिच्ने सल्लाह दिएको बताउदै निर्माता रिमेशले भने, 'एगि्रमेन्ट गर्ने वेलामै उहाँ इ-एक्स थ्रीमै काम गर्न राजी हुनुहुन्थ्यो । तर, अहिले उहाँ क्यामेराको कुरा अघि सार्नुहुन्छ । क्यामेरामा के राखेको छ ?' अभिनेता विराजले यसअघि इ-एक्स थ्रीमै खिचिएको रिमेशको फिल्म बसमा छैन यो मनमा अभिनय गरेका थिए । 'इ-एक्स थ्री, टु के, रेड, सुपर सिक्टिन, सिक्टिन जुन क्यामेराले खिचे पनि फिल्म राम्रो बनाउने हो । कलाकारको काम अभिनय गर्ने हो, जुन क्यामेरा भए पनि के फरक पर्छ ?' रिमेशले भने, 'उहाँको हातमा धेरै फिल्म भएकाले होला क्यामेराको बहाना बनाएको । तर एकजना कलाकारका लागि कुनै निर्माताले पनि आफ्नो निर्धारित बजेट बदल्छ भन्ने लाग्दैन, मलाई ।' निर्माता रिमेश विराजले समय दिन नचाहेकाले उनको भूमिकामा अभिनय गराउन अर्का नायकको खोजीमा लागेका छन् ।
वासुदेव पोखरेलको निर्देशक रहेको अंकुशको असोज पहिलो सातादेखि सुटिङ सुरु गर्ने योजनामा थिए, निर्माता रिमेश । तर, फिल्मको प्रमुख पात्रले नै आफ्नो फिल्मप्रति अनिच्छा देखाएपछि सुटिङ कहिले सुरु गर्नेमा निर्माता आफैँ अन्यौलमा छन् । भन्छन्, 'अब अर्काे हिरो साइन गरेर तिहारपछि सुरु गर्नुपर्ला । फिल्मको नाम पनि चेन्ज गर्ने सोचमा छु ।' पहिला रिमेशले यो फिल्ममा विराजका साथै उनका भाइ नायक कृष्ण भट्टलाई अनुबन्धित गरेका थिए । तर, अब आफ्नो फिल्ममा दुई भाइ नै नहुने उनले बताए ।
पछिल्लो समयमा अभिनेता विराज निकै व्यस्त छन् । उनको हातमा एकसँगै अर्काे फिल्म परिरहेका छन् । भोजपुरी फिल्मका लागि केही दिनमा मुम्बई जान लागेका उनी त्यहाँ झन्डै दुई महिना लाग्ने बताउँछन् । 'यहाँ-त्यहाँ फिल्मै फिल्म छन् । समय दिन गाह्रो छ,' विराज भन्छन्, 'मुम्बईमा भोजपुरीसँगै हिन्दी फिल्म गर्ने अफर आएको छ । त्यसकारण केही समय नयाँ फिल्म गर्न भ्याइँदैन ।'
