मेरो सिनेमा ८ असोज २०६७,
क्वेस्ट इन्टरटेनमेन्टले संचालनमा ल्याउन लागेको 'क्यूएफएक्स सिनेमाज' आगामी असोज १५ गतेबाट संचालनमा आउने भएको छ । नेपालमै पहिलोपटक सिनेमा ब्रान्डको रुपमा स्थापित हुन लागेको क्यूएफएक्सले जयनेपाल र कुमारी हलसँगै विश्वस्तरिय सेन्ट्रल सिनेमा संचालन गर्न लागेको हो । दक्षिण एसियामै पहिलोपटक जडान गरिएको प्रविधिमा संचालन हुने क्यूएफएक्स मुलुकमा एकमात्र अत्याधुनिक र विश्वस्तरिय मल्टिप्लेक्स हुनेछ ।क्वेस्ट अध्यक्ष नकिम उद्दिनका अनुसार सुन्धारास्थित सिभिल मलमा सुरु हुन लागेको क्यूएफएक्स सेन्ट्रलमा इन्टरनेटबाटै क्रेडिट कार्डमार्फत पनि टिकट खरिद गर्न सकिनेछ । 'एकसातापछि संचालनमा आउन लागेको हलमा अहिले इन्टरनेटमार्फत सिट हेरेर बुकिङ गर्न सकिन्छ' नकिमले मेरो सिनेमासँग भने 'एक महिनापछि क्रेडिट कार्डमार्फत घरमै बसेर टिकट खरिद गर्ने सुविधा हुनेछ ।' नयाँ कम्पनीको घोषणासँगै जयनेपाल र कुमारी अगाडि अब क्यूएफएक्स जोडिनेछ ।
नयाँ हलका लागि सिनेमामा रुचि भएका १० जना एमबिए गरेका युवा समूहको टीम तयार गरिएको छ । अत्याधुनिक डिजिटल प्रोजेक्टर जडान गरिएको क्यूएफएक्स सेन्ट्रलमा सिनेमा हलकै लागि अमेरिकामा निर्मित सिट प्रयोग गरिएको छ । हलमा सदस्यता लाभका साथै गुणस्तरिय स्न्याक बारको सुविधा छ । अत्याधुनिक भएकाले हलमा सिनेमापारखीले केही बढि मूल्य तिर्नुपर्नेछ । सिनेमा हेराइलाई मनोरन्जकमात्र होइन अविष्मरणीय बनाउने गरि हल निर्माण गरिएको दाबी उनको छ ।
