काठमाडौं, भदौ २४ (नागरिक)- नेपाल ललितकला प्रज्ञा प्रतिष्ठान (नाफा)को लोगो छनोट भएको छ। सुयोग्यराज काफ्लेद्वारा डिजाइन गरिएको लोगोको बुधबार प्रतिष्ठानका कुलपति किरण मानन्धरले सार्वजनिक गरेका हुन्। विज्ञापनपछि प्राप्त भएका ९७ वटा डिजाइनमध्ये निर्णायक समितिले काफ्लेको डिजाइनलाई सर्वोत्कृष्ट ठहराएको हो। केके कर्माचार्य, विजय थापा र अशोकमान सिंह सम्मिलित समितिले अरू पाँच लोगोलाई पनि उत्कृष्टका रूपमा छनोट गरेको छ।
उत्कृष्ट पाँच लोगो डिजाइन गर्नेमा सुन्दर बस्नेत, सागर मानन्धर, लालकाजी लामा, शिवा राणा र श्रुति साह रहेका छन्। सर्वोत्कृष्ट र उत्कृष्टहरूलाई चाँडै कार्यक्रम आयोजना गरी पुरस्कृत गरिने कुलपति मानन्धरले बताए।
लोगोको त्रिकोणात्मक आकारले सगरमाथा र स्थायीत्वलाई, नीलो रङले शान्ति, सुनौलो रङले नेपाली कलाको वैभव र सेतो लयात्मक रेखाले स्वच्छ नेपाली कलाको विकासको गतिलाई जनाउने प्रतिष्ठानका सदस्यसचिव केके कर्माचार्यले खुलाए।
source: nagariknews.com
